Ѓоковиќ успешно ја продолжува одбраната на титулата на Вимблдон
Новак Ѓоковиќ се пласира во осминафиналето на Вимблдон откако денеска го совлада Денис Кудла со 6:4,6:3,7:6.
Во наредната рунда, бранителот на трофејот го очекува Чилеанецот Кристијан Гарин кој во четири сета го совлада Шпанецот Мартинез.
Кудла кој на Вимблдон пристигна како 114 тенисер на светот, му пружи солиден отпор на првиот носител, посебно во третиот сет, но тоа не беше доволно да се „размрда“ Ѓоковиќ кој славеше по два часа и 16 минути игра.
Првиот сет беше израмнет до последниот десетти гем кога Ѓоковиќ го направи првиот брејк кој беше доволен за водство од 1:0 во сетови. Во вториот сет, Кудла покажа заби, одзеде еден сервис на Ѓоковиќ, но не можеше да стори ништо повеќе и го загуби со 6:3.
Како што одминуваше времето, Кудла даваше се посилен отпор и во третиот сет водеше со 4:1 во гемови. Во тие моменти речиси сите навивачи на трибините помислија дека ќе се игра и четврти сет, но така не мислеше Ѓоковиќ кој прво успеа да одзеде еден сервис на противникот, а потоа во тај-брејкот и да го освои сетот што значеше пласман во осминафиналето.
Убедлив триумф од 3:0 и тоа со 7:5,6:1,7:6 оствари и Роберто Баутиста Агут кој го совлада Германецот Кепфер.
Кај дамите, елиминирана е поранешната шампионка на Вимблдон, Гарбине Мугуруза која загуби од Тунижанката Онс Жабер која славеше со 5:7,6:3,6:2. Фуриозен пласман во осминафиналето обезбеди Ига Швјонтек која на Романката Бегу и дозволи да освои само еден гем, а триумф од 2:0 во сетови оствари Каролина Плишкова во мечот со сонародничката Мартинцова.