Иванишевиќ не е дел од тимот на Ѓоковиќ на Ролан Гарос, со српскиот тенисер е вториот тренер Маријан Вајда, но смета дека дисквалификацијата на УС Опен, всушност повеќе му помогна отколку што му одмогна на првиот носител.

– Ѓоковиќ има многу силна глава, тој е победник. Тоа го покажа на Мастерсот во Рим кога не го играше својот најдобар тенис, но сепак победи и според мене тој е главен фаворит на Ролан Гарос – изјави Иванишевиќ за хрватската телевизија ХТВ.

Иванишевиќ смета дека актуелните услови во Париз повеќе му одговараат на Ѓоковиќ.
– Го гледаме Надал и се е исто како и секогаш, но не е баш така. Ова се перфектни услови за Новак, но не и за Надал. Сметам дека во финалето ќе играат Ѓоковиќ и Надал и во него мислам дека Шпанецот нема шанси во вакви услови, Новак веќе му „влезе“ во глава. Тој своето тело и глава ги донесе до совршенство. Подготвен е и до најмал детал, од тактиката, техниката, до исхраната. Интересно е да се работи со него бидејќи сака секој ден да биде подобар, барем 0.0001 проценти, но мора да напредува и таков став досега не сум видел кај никого – додава Иванишевиќ.

За да дојде до пресметка во финалето помеѓу двајцата најдобри тенисери, тие најпрво ќе мора да триумфираат во полуфиналето. Ѓоковиќ пласманот во финалето ќе го брка против Пабло Карењо-Буста,а доколку победи го очекува полуфинална пресметка со подобриот од дуелот Рубљов-Циципас, додека Надал во полуифиналето ќе игра против Диего Шварцман.