Ѓорѓиев: Цело лето се „утепавме“ од работа, горд сум и среќен, заслуживме!
Македонија вечерва ја победи Црна Гора и речиси и да го обезбеди пласманот во осминафиналето, но капитенот Никола Ѓорѓиев, иако потенцира дека сонот е остварен, не сака тука да застанеме.
Ѓорѓиев беше презадоволен од добрата игра и победата која секако е заслужена.
„Одлична победа од 3:0, јас се надевам дека овие шест бода ќе не однесат во Италија. На крилјата на оваа публика е полесно, сега разбирам зошто Словенија е толку успешна во Стожице. Многу сум среќен и горд, ова е години и години работа. Ова лето се „утепавме“ од работа, доцна легнуваме рано стануваме, затоа се е заслужено“.
„Јас би сакал ова да е еден почеток, утре да уживаме бидејќи немаме што да изгубиме, па потоа да удриме „гради во гради“ со Холанѓаните. Зошто да не имаме подобар пласман и да ја избегнеме Италија во осминафинале? Видовме дека Црна Гора играше егал со Холандија до 17:17. Се надевам дека ќе дојде уште повеќе публика. Не сакам да звучам лошо, сонот е остварен, но зошто да застанеме тука? Зошто да не бидеме помеѓу најдобрите осум и да го обезбедиме пласманот директно на следното Европско првенство за следната година“, изјави Ѓорѓиев.
Утре во истиот термин, Македонија ја чека натпревар против Полска која во натпреварот влегува како голем фаворит.