Американската реалити ѕвезда и поранешна манекенка Бранди Гланвил откри дека причината за уништеното лице подолго време биле нејзините имплантати во градите. Таа за „ТМЗ“ изјавила дека имплантатите, кои ги имала вградени пред 20 години, пукнале. Силиконот истекол во лимфните јазли, ги затнал и на крајот предизвикал инфекција на лицето.

„Дефинитивно имав паразит. Бев шокирана бидејќи скоро 20 години имав имплантати. Изгледаа добро, ми беше удобно, мамограмот покажа дека се во ред. Само ултразвукот покажа дека не се во ред. Чувствував дека треба да ги проверам, зошто да не..“, изјавила таа.

Бранди навела дека посетила дури 21 лекар и потрошила многу пари додека конечно не ја добила вистинската дијагноза.

Таа истакнала дека постои болест предизвикана од имплантати во градите и дека имплантатите би требало да се менуваат на секои 10 години. Таа призна дека тоа не го направила и дека научила тешка лекција.

Според „Cleveland Clinic“, оваа болест може да се појави години по вградувањето и предизвикува широк спектар на симптоми.

Бранди додала дека „ужасно е преку ноќ да остариш 20 години“ и дека посетувала ласерски третмани за лице и неодамна ги променила имплантатите во градите.