Легендарните „Битлси“ одлучија зградата во Лондон каде што го одржаа својот последен јавен настап да ја претворат во импресивен изложбен простор. Официјално насловено како „The Beatles at 3 Savile Row“, ова искуство ќе биде отворено во 2027 година и ќе им овозможи на фановите да поминат низ седум ката исполнети со ретки експонати и никогаш претходно видени архивски материјали, пишува „Би-би-си“.

Зградата на улицата Савил Роу број 3 има огромно значење за бендот. Таа служеше како нивно седиште помеѓу 1968 и 1972 година, а токму во подрумското студио беше снимен нивниот последен албум, „Let It Be“.

Сер Пол Макартни објасни дека идејата е да им се понуди на туристите официјална дестинација во центарот на Лондон, наместо само да се собираат пред студиото на „Abbey Road“ и да го кочат сообраќајот.

Највозбудливиот дел од музејот ќе биде можноста фановите да се искачат на самиот покрив, на точното место каде што во јануари 1969 година, „Битлси“ го одржаа својот последен, ненајавен концерт кој траеше 42 минути пред полицијата да го прекине.

„Се искачувате низ зградата, гледате што сè се случувало низ годините, додека не стигнете до самиот врв каде што можете да излезете на покривот и да се преправате дека сте еден од ’Битлсите‘“, вели Макартни.

Нова енергија и нова музика

Иницијативата за овој проект дојде од новиот извршен директор на „Apple Corps“, Том Грин, кој претходно работеше на франшизата „Harry Potter“. Додека се подготвува музејот, преживеаните членови не мируваат на музички план. Ринго Стар минатиот месец го објави својот 22-ри албум, „Long Long Road“, додека новиот албум на Пол Макартни, „The Boys of Dungeon Lane“, се очекува кон крајот на овој месец и ќе биде исполнет со рефлексивни песни за неговото детство и почетоците на бендот.