Коки Јанков сподели уште една интересна приказна за својата ќерка Лара, со која живее во Штип. Таа е ученичка во средното медицинско училиште.

Виолинистот објави фотографија од писменце што му го оставила ќерката, барајќи му пари за џепарлак. „Сиромашна сум моментално. Те молам пари“, му напишала ќерката на музичарот, а тој на фотографијата додал симпатични коментари: „Нема проблем, тати“ и „Понеделнички, кога ќе тргне“.

Неодамна, Коки Јанков сподели видео со ќерката, кое го нарече „домашно воспитување“, и објави како тој и ќерка му ги слушаат Шинејд О’Конор и Роџер Вотерс во весела атмосфера. Кога камерата ја сврте кон себе, тој рече: „Едукација“.

Јанков е наставник по виолина во музичкото училиште во Штип, а ќерка му, која ја има од бракот со Росана Петревска, со која се разведе во 2018 година, сега живее со него.

„Таа вели дека има најдобар татко (ха-ха). Имаме свои шеги и свои шеми на функционирање по дома. Без да ја покријам и гушнам пред спиење (кога сум дома), не се разделуваме. Секое сабајле станувам со неа, појадокот ѝ е ставен во ранец, а за ручек сме седнати заедно. Дома ни е најубаво. Не ѝ е забрането ништо, но имаме принципи и мали правила. Изборот е нејзин. Нека е човек. И на Лара и на сите деца, нека патот им е чист, нека не се предаваат, нека отвораат очи, а срцето нека го чуваат за тој што вистински заслужува“, рече за својата ќерка музичарот во „Слободен печат“.

„Училиштето ѝ оди супер, а околу музиката се ‘пали’ на рокенрол. Тоа е добро. Веќе имаме листи, па кога се возиме ми пушта, а јас внатре се топам и се присетувам дека со таа музика растевме и ние. Понекогаш не ја разбирам околу тоа како се изразува, ама ете, сè уште растам со неа. Некои нови клинци. Ме усреќува и ќе биде така сè додека е до мене“, додаде Никола Јанков – Коки.

ВИДЕО | „Пустото не ме остава на раат“: Коки го најави најтажното и најуникатното нешто што го направил