ФОТО | Како да си направите празничен венец? – Цветната приказна со порака на Eлена: Да споделуваме, заедно да се радуваме и да ги негуваме даровите од природата
Елена Петровска е креативката која стои зад цветната приказна Цветна порака. Приказната започнала неодамна, поточно пред само два месеци, но идејата ѝ била присутна подолго време. Љубовта кон цвеќето и природата на Елена ѝ ја пренеле нејзините родители кои посветено си креирале своја цветна градина, неисцрплив извор на среќа.
– Верувајќи на концептот, креативноста и желбата да пренесеме убава порака, благодарни сме што идејата е препознаена и прифатена и што ја исполнуваме визијата да пренесеме порака што среќа носи – вели Елена во нашиот празничен разговор.
Која е пораката која ја пренесувате?
– Да споделуваме, заедно да се радуваме и да ги негуваме даровите од природата. Во креирањето на среќата да се грижиме за животната средина, овозможувајќи секој од нас да има придонес во процесот на селекција и заштита на природата.
Велите дека нудите поинакво цветно уживање, какво?
– Негувајќи ја поврзаноста со природата и уживајќи во секој момент, креираме производи од природно сезонско цвеќе со употреба на одржливи материјали кои може повторно да се употребат и рециклираат. Цветните аранжмани се стандардизирани во категории, но отворени сме за можност цветниот дизајн да биде усогласен според преференциите на купувачите за индивидуални и корпоративни настани.
Креиравме картонски обвивки за букети од природата, хартиени вазни како дел од пакет со цвеќе за најмалите кои креираат своја среќа во боја и креираме насмевки со букети…