Мајчинството во подоцнежните години носи сосема поинакво искуство, а актерката Ева Лонгорија го сподели своето гледиште за тоа како е да се стане мајка на 43 години. Таа вели дека ова и донело повеќе мудрост и трпение при воспитувањето на нејзиниот син.

„Кога стануваш мајка во четириесеттите, имаш многу повеќе мудрост и трпение. Четириесет години го живеев животот посветен само на себе. Тоа беше доволно време да се посветам на кариерата, патувањата и сè што сакав да остварам. Затоа се чувствувам благословено што станав мајка подоцна“, изјави Лонгорија за „The Times“.

Актерката додава дека сега гледа на светот со поинаква перспектива и дека најубавото е што сè може да го сподели со својот син.

„Сите старееме, тоа е едноставно така. Немаш избор, освен да го прифатиш тоа. Јас само сакам да стареам добро – да се движам, да планинарам, да се качувам и симнувам по скали без проблеми. Сè уште го носам мојот седумгодишен син“, вели таа.

Лонгорија посочува дека семејството сега ѝ е најголем приоритет, а голема улога игра и нејзиниот сопруг, со кого е во брак околу десет години.

„Ако кажам ‘да’ на нешто што ме одвојува од семејството, тоа мора да биде проект во кој уживам и со луѓе со кои сакам да се опкружам. Кариерата ми е важна, но распоредот ми е често хаотичен. Затоа сум благодарна што најдов сродна душа која целосно ги поддржува моите соништа, цели и сè што сакам да остварам“, истакна Лонгорија.

Таа додава дека сега повеќе размислува за тоа како нејзиниот син ќе гледа на нејзината работа во филмската индустрија.

„Се прашувам што ќе оставам зад себе, бидејќи мојот син ќе го гледа тоа. Се прашувам дали ќе биде горд или ќе се срами од мене. Дури и кога гледам стари фотографии, се фаќам себеси како мислам: ‘О Боже, тој ќе го види ова еден ден’“, признава актерката.