Промената на мобилен телефон од 1 јуни ќе стане значително поедноставна и побрза, бидејќи Европската Унија воведува нови правила што ќе го олеснат преносот на податоци меѓу уредите на „Епл“ и оние со „андроид“ систем, пренесува „Еуроњуз“. 

Откако успешно воведе универзални полначи за сите паметни телефони, Европската Унија сега поставува нова цел — олеснување на префрлањето податоци од еден телефон на друг, без разлика кој оперативен систем се користи.

Главниот проблем досега беше големата поделеност меѓу двата најголеми мобилни системи — „ај-о-ес“ (iOS) и „андроид“. Затвореноста на овие системи го правеше преминот од една платформа на друга сложен и често фрустрирачки за корисниците.

Оваа важна промена доаѓа во рамки на Законот за дигитални пазари, кој ги обврзува големите технолошки компании да обезбедат вистинска преносливост на податоците. Поради тоа, „Епл“ и „Гугл“ забрзано работат на заедничко решение што ќе им овозможи на корисниците директно да префрлаат контакти, пораки, фотографии и податоци од апликации при поставување нов уред, со што значително ќе се намалат проблемите при промена на технолошкиот систем.

Промената е дел од поширок процес на меѓусебна поврзаност што го бара Брисел. Според одлуката на Европската комисија од март 2025 година, „Епл“ ќе мора до 1 јуни 2026 година дополнително да го отвори својот оперативен систем „ај-о-ес“ за уреди од други производители.

Меѓу планираните подобрувања е и можноста паметни часовници што не се произведени од „Епл“, како часовниците на „Самсунг“ или „Гармин“, да можат да управуваат со известувањата на „ајфон“. Исто така, се очекува побрзо и полесно поврзување со надворешни додатоци и опрема, со што корисничкото искуство со производи од други брендови ќе се доближи до она што моментално го нуди само „Епл Воч“.

Во целина, овие мерки имаат цел да ги урнат бариерите меѓу различните технолошки системи и да им овозможат целосна слобода на избор на корисниците, кои повеќе нема да бидат „заробени“ во една платформа поради страв од губење на податоците.