Професионален електричар предупреди дека многу домови се склони кон чести, но опасни електрични проблеми што можат да предизвикаат пожари или сериозни штети.

Џејмс Харисон, директор на „Фјужн електрик“, ги повикува сопствениците на домови да обрнат поголемо внимание на своите електрични системи бидејќи еден од најголемите ризици често лежи во начинот на кој се користат домашните апарати, објавува „Експрес“.

„Еден од најчестите проблеми со кои се соочуваме се преоптоварените продолжни кабли, особено во кујните и спалните соби. Луѓето вклучуваат повеќе апарати со голема моќност истовремено, како што се чајници, тостери и микробранови печки, без да сфатат колку електрична енергија трошат. Само затоа што има четири приклучоци не значи дека е безбедно да се користат сите одеднаш. Ова лесно може да доведе до прегревање или дури и пожар“, предупредил Харисон.

Обидот да се заштедат пари на електрични инсталации во домот честопати може да се покаже како опасен и скап.

„Честопати сме повикани да поправаме опасни инсталации или разводни табли кои не се правилно одржувани. Ако не знаете точно што правите, лесно можете да направите краток спој, електричен удар или да предизвикате опасност од пожар. Едноставно не вреди ризикот“, рекол електричарот.

Многу луѓе исто така не знаат дека некои безбедносни уреди треба редовно да се проверуваат и заменуваат, особено RCD кои автоматски ја исклучуваат струјата кога ќе откријат проблем.

„Во многу домови, RCD не е тестиран со години или е неисправен и никој не го забележува тоа. Секој дом треба да има функционален RCD – буквално може да спаси живот во случај на електричен дефект“, објаснил тој.

Тој исто така нагласува дека луѓето често не ги забележуваат знаците дека нешто не е во ред со нивните електрични инсталации. Тие вклучуваат зуење на прекинувачи, трепкачки светла и непријатни мириси, поради што им советува на сите веднаш да контактираат електричар ако забележат некој од овие проблеми.

„Луѓето мислат: ‘Веројатно не е ништо’ и продолжуваат да го користат неисправниот штекер или прекинувач, но овие знаци обично значат дека нешто се прегрева или искри, што претставува сериозен ризик од пожар. Иако електричните инсталации во домот на прв поглед може да изгледаат како да се во добра работна состојба, честопати можат да се појават проблеми. Многу често се среќаваме со вакви ситуации. Редовното одржување и навремените поправки можат да спречат посериозни дефекти, па дури и да спасат животи“, заклучил Харисон.