Египетскиот селектор, Парондо: Среќен сум поради Македонија, имам убави спомени!
Роберто Парондо кој успеа со Вардар 1961 да ја освои Лигата на шампионите, моментно е селектор на репрезентацијата на Египет.
Токму на Светското првенство кое го одржуваат токму Египќаните, шпанскиот стратег е еден од противниците на Македонија во групата „Г“. Парондо беше среќен после успешниот старт на неговата селекција и победата над Чиле (35:29).
– Навистина сум задоволен од победата и се надевам дека ова ќе биде долг шампионат за нас. Игравме навистина добро и во одбраната, и во нападот. Не можам да барам повеќе. Морам да му честитам и на Чиле и им посакувам сè најдобро до крајот на турнирот. Ѝ честитам на Владата на Египет и на сите во организацијата за ваквиот голем настан.
Ел Ахмар (десен бек) има проблеми на грбот и мислев дека е добро да го чувам за дуелите со Македонија и Шведска. Нема никакво казнување или нешто слично, далеку од тоа. Им честитам на Македонците на доаѓањето во Египет, но истовремено жал ми е што отпадна Чешка. Таа ситуација секако не е лесна за тренерот, бидејќи со месеци се подготвувавме за Чесите, а сега имаме многу кратко време да се подготвиме за тотално поразличен противник. Среќен сум поради Македонија, имам убави спомени од Скопје – рече Парондо.
Мечот помеѓу Египет и Македонија ќе се игра в сабота од 18.00 часот.
