Две бронзи од Европското првенство во карате за кадети, јуниори и У21
На Европското првенство во карате за кадети, јуниори и помлади сениори У21, што се одржуваше од 3 ди 5 февруари 2023 година во Ларнака, Кипар, македонските репрезентативци во дисциплината У21 кумите -84 и +84 кг. Витомир Трајковски и Стефан Стојановиќ, освоија бронзени медали.
Трајковски во првото коло го победи претставникот од Италија, Фиоре Матео со 2:1, во второто коло победа против Португалецот Миранда Хозе со 4:3, во третото коло го победи Хрватот Александар Калабаќ со 4:1, додека во четвртото коло претрпе пораз од Украинецот Максим Бухајов со 1:2.
Понатаму во репасажот извојува победа против претставникот од Белгија Данил Анисиво на изјаснување при резултат од 4:4 со што нашиот натпреварувач го освои третото место и бронзениот медал.
Стојановиќ во првото коло го победи претставникот од Грузија, Мераби Гелашвили со 2:0, во второто коло го победи претставникот од Ирска, Ли Шеридан со резулат 2:0, во третото коло извојува победа против претставникот од Чешка со резултат 4:3, и во четвртото коло загуби од Италијанецот Матео Аванчини со 4:5. Во репасажот се сретна со претставникот од Словачка, Малик Багаев против кого избори трето место и бронзен медал со резултат 4:0.
Од останатите наши каратисти, во женска конкуренција најуспешни беа Викторија Јовановска во категоријата У21 -61 кг. со освоено петто место, седма позиција за Симона Николовска во категоријата У21 +68, и четири деветти места од кои тројца во У21 Бојан Костов, Марио Свинарски, Јусра Адеми и во јуниорска конкуренција Греса Мустафаи.
– Генерално сум задоволен од настапот на сите репрезентативци иако можеше многу подобро. Меѓутоа две трети места, едно петто и едно седмо место е солиден настап за мене како селектор. Останува да работиме уште по напорно и да се средат сите мани кои ги увидовме. Натпреварувачите и целата делегација беа на висина на својата задача мотивирано и сите заедно сложно до крај дадоа поддршката во остварување на конечниот резултат – вели селекторот на У21, Мартин Несторовски.
На ова натпреварување учествуваа вкупно 1114 каратисти од вкупно 48 држави.