Австриските обвинители подигнаа обвинение за тероризам против 21-годишно момче, за кого тврдат дека планирало напад за време на еден од концертите на Тејлор Свифт во Виена во август 2024 година. Три концерти во рамки на рекордната турнеја на Тејлор беа откажани откако властите предупредија на можна опасност од напад.

Портпарол на Јавното обвинителство во Виена во понеделникот потврди дека обвинетиот се наоѓа во притвор. Австриските медиуми го идентификуваа осомничениот како Беран А. и наведоа дека бил уапсен во август 2024 година.

Според обвинението, тој „преку интернет добил упатства за изработка на бомба базирана на експлозив од органски пероксид, каков што често користи групата „Islamic State“ и произвел мала количина експлозив“.

Обвинителите наведуваат дека осомничениот повеќепати се обидел нелегално да набави оружје надвор од земјата и да го внесе во Австрија.

Исто така, се тврди дека бил вмешан во планирање други напади во странство, вклучително и во Дубаи и Истанбул, иако тие напади никогаш не биле реализирани.

Доколку биде прогласен за виновен, му се заканува казна затвор до 20 години.

По откажувањето на концертите, Тејлор Свифт на социјалните мрежи напиша: „Причината за откажувањето ме исполни со ново чувство на страв и огромна количина вина, бидејќи толку многу луѓе планираа да дојдат на тие концерти“.

За љубовта што доаѓа по скршено срце: Тејлор Свифт го објави спотот за „Opalite“, со Донал Глисон во главна улога