Дури 40 земји би можеле да ги бојкотираат ЛОИ 2024 Париз, што ќе го направи целиот настан бесмислен, изјави полскиот министер за спорт и туризам Камил Бортничук. За ова јавува Би-Би-Си.

Изјавата следуваше откако Полска, Литванија, Естонија и Летонија заеднички го отфрлија планот на Интернационалниот олимписки комитет (ИОК) да им дозволи на Русите и Белорусите да се натпреваруваат на ЛОИ 2024.

Украина се закани дека ќе ги бојкотира Игрите во Париз ако тоа се случи. Но, ИОК возврати дека секој бојкот само ќе ги „казнува спортистите“. Според Бортничук, би било можно да се изгради коалиција од 40 земји, вклучувајќи ги Велика Британија, САД и Канада, за да се поддржи блокадата на плановите на ИОК пред состанокот на 10 февруари.

– Ако ги бојкотираме Игрите, коалицијата во која ќе бидеме дел ќе биде доволно широка за да го направи одржувањето на Игрите бесмислено – смета полскиот министер.

ИОК објави дека ќе „истражи можност“ за да им дозволи на руските и белоруските спортисти да се натпреваруваат во Париз под неутрално знаме, додавајќи дека „ниту еден спортист не треба да биде спречен да се натпреварува само поради својот пасош“…