Делта сојот е 97% застапен кај новозаразените во Германија
Позаразната делта варијанта на коронавирус сега сочинува околу 97 проценти од новите случаи на Ковид-19 во Германија, објави во петокот германската државна агенција за контрола на болести.
Институтот Роберт Кох потврди уште 3.448 случаи на коронавирус во последните 24 часа и дека бројот на случаи повторно се зголемува.
Здравствените власти третиот ден по ред регистрираат над 3.000 нови инфекции, за прв пат од јуни.
Според податоците на овој институт, бројот на нови случаи е особено зголемен кај тинејџерите и помладите возрасни лица.
Во Германија има 29.900 активни случаи на Ковид-19 и покрај големото зголемување на бројот на случаи во последните недели, бројот на хоспитализации и смртни случаи остана релативно низок, во споредба со првиот и вториот бран на пандемијата.
Во петокот беа регистрирани 24 смртни случаи поврзани со коронавирус, а 393 сериозно болни пациенти со коронавирус во моментов се лекуваат во одделенијата за интензивна нега.
Германија неодамна ја засили кампањата за вакцинација и постигна значителен напредок. Според податоците од четвртокот, 45 милиони луѓе во Германија или 54,1 проценти од населението се целосно вакцинирани, а повеќе од 51,8 милиони луѓе или 62,2 проценти од населението примиле барем една доза.