По апсењето на венецуелскиот претседател Николас Мадуро од страна на американските сили за време на викендот, претседателот на САД Доналд Трамп упати серија остри пораки и предупредувања до повеќе држави, меѓу кои Колумбија, Куба, Мексико, Иран, но и до Гренланд, објави Си-ен-ен.

Трамп изјави дека целта на САД е да обезбедат „одржливи и просперитетни земји“ во нивното опкружување и нагласи дека „американската доминација на западната хемисфера никогаш повеќе нема да биде доведена во прашање“.

Особено внимание предизвикаа неговите изјави за Гренланд, за кој повтори дека е неопходен за американската национална безбедност, што предизвика остри реакции од властите во Гренланд и Данска.

Во однос на Колумбија, Трамп го нападна претседателот Густаво Петро, оставајќи отворена можност за американска „операција“ против трговијата со дрога, што колумбискиот лидер го отфрли како неосновано и навредливо. За Куба, американскиот претседател оцени дека режимот е пред колапс поради губењето на венецуелската поддршка, додека Хавана најави дека ќе го зачува сојузот со Каракас „по секоја цена“.

Трамп повторно го обвини и Мексико дека не прави доволно во борбата против нарко-картелите, а откри и дека ѝ понудил воена помош на мексиканската претседателка Клаудија Шајнбаум. Во исто време, тој упати закани и кон Иран, предупредувајќи дека САД ќе реагираат „многу силно“ доколку иранските власти продолжат со насилството врз демонстрантите.