Ако сте претерале со сончање, гелот од алое вера е вашиот спас. Ова растение ја негува кожата, ѝ дава исклучителна хидратација и е прва помош за црвената кожа што гори и пече.

Гелот од алое вера може да се купи во аптеките, но и во речиси сите дрогерии, а неговата карактеристика е што ја олеснува болката од изгорениците и ѝ помага на кожата побрзо да се опорави.

Алое вера во себе го содржи природното соединение алоин, за кое лабораториските тестирања покажуваа дека има антиинфламаторно и антиоксидативно дејство.

„Другите истражувања покажуваат дека алое вера е исклучително корисно растение, особено за третман на изгореници. Преглед на четири студии во кои беа вклучени 371 лице покажа дека алое вера е ефикаснен лек за изгореници од прв и втор степен“, пишува вебмд.

Изгорениците од прв степен се најлесни. Изгорената кожа станува црвена, многу чувствителна на допир и влажна или отечена. Изгорената површина побелува кога ќе ја допрете, но не се развиваат плускавци. Изгорениците од втор степен предизвикуваат подлабоки штети. На кожата се создаваат плускавци. Основата на меурчињата може да биде црвена или бела исполнета со чиста, густа течност.

Гелот од алое вера исто така ќе ѝ помогне на кожата да се регенерира. Исто така, лади, поради самата текстура, и дополнително ќе ве освежи доколку гелот го чувате во фрижидер.