Генералниот секретар на Обединетите нации, Антонио Гутереш, вчера ги повика земјите да ја покријат финансиската дупка од 100 милиони долари за агенцијата на ОН за палестински бегалци (УНРВА), предупредувајќи дека милиони луѓе се изложени на ризик поради недостигот на средства, објави „Ројтерс“.

Гутереш на состанок на Генералното собрание за доброволни придонеси изјави дека ситуацијата во УНРВА станува сè понестабилна поради строгите ограничувања низ окупираните палестински територии кои ја отежнуваат нејзината работа, како и поради големиот недостиг на средства.

Агенцијата на ОН работи во Газа, Западниот Брег, Либан, Јордан и во Сирија, обезбедувајќи помош, образование, здравствена заштита, социјални услуги и сместување за 2,6 милиони Палестинци.

САД беа најголем донатор на УНРВА, но во јануари 2024 година го прекинаа финансирањето откако Израел обвини околу десетина вработени во агенцијата дека учествувале во смртоносниот напад на 7 октомври 2023 година, изведен од Хамас.

Шведска исто така го намали своето финансирање за 2025 година. Други големи донатори привремено ги замрзнаа средствата додека траеше истрагата за обвинувањата, но повеќето подоцна повторно ги продолжија придонесите.

Гутереш рече дека кризата со парите ја загрозува способноста на агенцијата да ја исполнува својата мисија, која беше обновена од Генералното собрание пред шест месеци со огромна поддршка од членките.

„Тие не можат да продолжат вака без итна поддршка и без финансиска помош од земјите-членки“, изјави тој, додавајќи дека агенцијата презела значајни реформи и ги ажурирала своите политики за надворешни активности по обвинувањата од Израел.

Гутереш ја опиша ситуацијата во Газа како „ужасна“: Нема паралела во модерната историја

Тој ги отфрли, како што рече, континуираните обиди за поткопување на агенцијата преку „дезинформации, кампањи за дискредитација, законски мерки, оперативни ограничувања, дипломатски блокади и друго“.

Гутереш предупреди дека ваквите дејствија го загрозуваат доброто на милиони Палестинци, како и безбедноста на персоналот на УНРВА, наведувајќи дека од октомври 2023 година во Газа биле убиени 390 вработени во агенцијата.

Тој исто така истакна дека 1.000 Палестинци биле убиени во израелски напади по примирјето објавено во октомври.

Намалување на услугите

ОН соопштија дека отпуштиле девет вработени во УНРВА кои можеби биле вмешани во нападот во октомври 2023 година, во кој загинаа околу 1.200 Израелци и странски државјани.

Исто така, командант на Хамас во Либан, убиен во септември од Израел, бил вработен во УНРВА.

ОН ги оспоруваат врските со Хамас и ветуваат дека ќе ги истражат сите обвинувања.

УНРВА годинава ги намалила своите услуги за 20 отсто, ги намалила платите на локалниот персонал и оставила 15 проценти од меѓународните позиции непополнети, рече Гутереш.

„Секое дополнително намалување може да ги турне условите “, додаде тој.

Портпаролот на ОН, Стефан Дижарик, изјави дека агенцијата се соочува со егзистенцијална криза. Тој додаде дека резултатите од состанокот за доброволни придонеси ќе бидат објавени во среда.

Дали ќе има доволно хуманитарна помош за Појасот Газа?