Секоја година на 29 јуни, на празникот на Свети Петар, илјадници луѓе се собираат во шпанската покраина Ла Риоха за да учествуваат во необична традиција – Батаља дел вино, или Винска битка, објави „Пункуфер“.

Уникатниот фестивал се одржува на карпите на Билиби, неколку километри над градот Харо, а учесниците тргнуваат рано наутро кон местото на големиот вински судир. Сите учесници се облекуваат во бела облека од глава до пети која ќе стане темноцрвена до крајот на битката.

Прво се застанува кај локалната црква, каде што се одржува миса во чест на светецот-заштитник на градот, Свети Феликс (Сан Феличес), а по мисата започнува битката. Оружјето го бираат самите учесници – од водни пиштоли, до садови и кофи и многу друго. На крајот на пресметката, нема победници или губитници. Единствената цел е до крајот на битката никој да не остане облечен во бело и сите да се забавуваат.

Потеклото на Винската битка е поврзано со вековен граничен спор помеѓу Харо и соседниот град Миранда де Ебро, кој се водел токму поради сопственоста на областа Билиби. Со текот на времето, поклоненијата и свечените церемонии се претвориле во весело точење вино, а обичајот прераснал во еден од најпознатите вински настани во Шпанија.

Денес, Винската битка повеќе не е само локален обичај. Секоја година привлекува илјадници туристи од целиот свет, а шпанските власти ја прогласиле за настан од национално туристичко значење. По винската битка, прославата продолжува со враќање во Харо со музика, поворки, танцување и бројни гастрономски и културни настани.

Иако за време на фестивалот се истураат десетици илјади литри вино, главно вино со пониска пазарна вредност е наменето за овој настан, додека познатите вина од Риоха остануваат резервирани за винарски визби и дегустации.

ФОТО | Магијата на Италија: Бајковит град крие незабележливи „прозорци“ каде што можете да нарачате вино