Македонските репрезентативци Стефан Ристовски и Аријан Адеми се наоѓаат на два натпревари од пласман во групната фаза во Лигата на шампионите откако нивниот тим Динамо Загреб и во вториот меч славеше против Лудогорец.

Во реваншот кој се играше во Загреб, Динамо со 4:2 го совлада бугарскиот шампион и со вкупен резултат 6:3 обезбеди двомеч со Бодо/Глимт за пласман во ЛШ.

Динамо во првото полувреме имаше предност од 3:0 откако прво Дрмиќ погоди во 12 минута на асистенција на Ристовски, а потоа на сцена стапи Мислав Оршиќ кој даде два гола, во 27 минута од пенал и во 44 минута.

Бугарите во последните моменти од првиот дел преку Десподов намалија на 3:1, а на стартот од второто полувреме, истиот играч погоди во 49 минута. Но, шансите за изненадување на Лудогорец ги урнаа Рик и Карничник кои добија црвени картони, а претходно во првиот дел беше исклучен и Јанков.

Предноста од тројца играчи на теренот, Динамо ја искористи во финишот да даде уште еден гол, преку Петковиќ од пенал.

Ристовски го одигра првото полувреме, а на паузата тренерот Анте Чачиќ го извади од игра бидејќи заработи во 21 минута заработи жолт картон. Аријан Адеми со капитенската лента на раката го одигра целиот натпревар.

Пласман во плеј-офот обезбеди и Бенфика која и во реваншот го совлада Митлијанд (1:3) и со вкупен резултат 2:7 ги елиминира Данците.

Карабак приреди изнедадување и со 1:3 го победи Ференцварош откако првиот дуел во Азербејџан заврши без победник (1:1).