Црвена звезда со победнички ритам влегува во пресрет на евролигашкото дерби со Партизан, откако во драматичен меч од АБА лига го совлада Дубаи со 92-90.

Белградскиот состав имаше одличен старт и уште во првото полувреме изгради висока предност, која во еден момент достигна и 19 поени разлика. Во тие моменти изгледаше дека прашањето за победникот е решено, особено ако се земе предвид дека гостите реализираа само 33 поени до паузата.

Сепак, сценариото драстично се промени по одморот. Дубаи заигра многу поагресивно и ефикасно, па со одлична трета четвртина (27 поени) успеа целосно да се врати во игра и да внесе неизвесност во завршницата.

И покрај налетот на противникот и одличната партија на Двејн Бејкон, кој беше најголема закана за домашните, Звезда успеа да ја сочува предноста и да стигне до важен триумф.

Најефикасен кај победникот беше Миљеновиќ со 20 поени, додека солиден придонес дадоа и Батлер и Риверо со по 13. На спротивната страна, покрај Бејкон со 31 поен, се истакна и Петрушев со 16 поени.