Иако најчесто завршува во канта, кората од киви е вистинска ризница на хранливи материи. Таа содржи повеќе корисни состојки од самиот плод, го зајакнува имунитетот и придонесува за подобра контрола на холестеролот и крвниот притисок.

Кивито е особено ценето поради високиот процент антиоксиданси и растителни влакна. Еве пет силни причини зошто вреди да го јадете кивито – заедно со кората.

Богата со антиоксиданси

Кивито е одличен извор на антиоксиданси, супстанции кои ги штитат клетките од оштетување. Во кората се наоѓаат значајни количини витамин Ц и витамин Е. Со консумирање на киви со кора, значително го зголемувате внесот на овие витамини кои играат важна улога во јакнењето на имунолошкиот систем.

Помага во апсорпција на железо

Витаминот Ц му помага на организмот подобро да го апсорбира железото, особено таканареченото нехемско железо кое се наоѓа во растителната храна. Јадењето киви со кора, во комбинација со намирници богати со железо, може да биде особено корисно за луѓе склони кон анемија.

Истражувања покажале дека кај лица со низок процент на железо, консумирањето две кивија дневно со појадок збогатен со железо, во период од 16 недели, довело до значително подобрување на нивото на железо, кое на крајот се нормализирало.

Придонесува за здрав крвен притисок

И плодот и кората од киви содржат калиум – минерал неопходен за одржување на рамнотежа со натриумот во организмот. Оваа рамнотежа е клучна за регулирање на крвниот притисок, бидејќи вишокот натриум може да доведе до негово покачување.

Покрај тоа, кората содржи и магнезиум, кој помага во опуштање на крвните садови и овозможува подобар проток на крвта.

Ја подобрува дигестијата

Кората од киви е богата со растителни влакна кои ја поттикнуваат здравата работа на дигестивниот систем. Истражувањата покажуваат дека јадењето киви со кора може да го зголеми внесот на влакна и до 50 проценти.

Ова има двоен ефект: помага за поредовна и полесна столица, а воедно влакната во дебелото црево ги разградуваат корисните бактерии, создавајќи кратколанечни масни киселини кои го штитат дебелото црево и можат да го намалат ризикот од рак на дебелото црево.

Го подобрува холестеролот и го јакне имунитетот

Иако кивито природно не содржи холестерол, тоа е богато со растворливи влакна кои помагаат во одржување на здраво ниво на холестерол и стабилен шеќер во крвта. Овие влакна ја забавуваат дигестијата и позитивно влијаат на метаболизмот.

Дополнително, здравата цревна флора што се поттикнува со консумирање на киви со кора директно придонесува за посилен имунолошки систем и побрзо закрепнување при болести.

Заклучок:
Следниот пат кога ќе земете киви, размислете двапати пред да ја излупите кората – токму таму се крие дел од најголемите здравствени придобивки.