По речиси шест часа, завршија внатрепартиските консултации во Демократската унија за интеграција (ДУИ) во партиското седиште во Мала Речица, а одлуките ќе се носат утре, на состанок на Централниот совет на партијата.

Портпаролот на ДУИ, Бујар Османи, по завршувањето на средбата рече дека консултациите на членовите на претседателството со партиските ограноци била конструктивна. На средбата, околу еден час пред таа да заврши, пристигнаа и претставници на т.н. „огнена група”, која бараше реформи во партијата.

–Имавме неформална консултативна средба на претседателот Ахмети, со претставници од партијата од различните ограноци во подготовка за утрешниот состанок на Централниот совет, каде ќе се донесат одлуки за формирање на Централното претседателство и другите органите на партија. Претседателот Ахмети правеше индивидуални средби овие денови, меѓутоа веќе во два наврати средби со повеќе функционери од партијата со кои се разменуваа ставови, консулатации како утре да се донесат одлуките на Централниот совет. Мислам дека целата средба помина во најконструктуивна атмосфера, во една атмосфера на соработка, на унифицираност, на спремност на партијата за нови победи, рече Османи.

Во Тетово утре ќе се одржи состанокот на Централниот совет на ДУИ. Треба да се изберат генерален секретар, организациски секретар и нови потпретседатели, со мандат до следниот конгрес. „Огнените“, како што објави „Слободен печат“, се на чекор од формирање фракција во партијата, откако немало волја кај Ахмети за исполнување на нивните барања за разрешување на Артан Груби и други функционери.

Реорганизацијата во партијата почна откако на 24 септември т.н. „Огнена група” побара реформи во ДУИ, а одредени функционери да понесат одговорност.