Премиерот Зоран Заев на прес конференција информираше дека Владата го утврди текстот на измените и надополнувањата на Законите за работни односи и Законот за трговски друштва со кои недела се прогласува за ден за неделен одмор и овие законски измени ќе бидат ипратени на усвојување во Собранието.

– Тоа е ветување што владата го стави како приоритет во својата програма и откако ги завршиме сите консултации во еден исклучиелно инклузивен процес го утврдивме усогласеното законско решение. Примената на оваа одлука ја проектираме да започне на 1. октомври – рече премиерот Заев.

Тој додаде дека неделата ќе биде ден за неделен одмор, а работниците кои сепак би морале да работат во недела ќе добијат повисока плата за тој ден или пак слободен друг ден.

– Вработените во секторите кај кои не е можен прекин на техничко-технолошкиот процес, ќе добиваат дневница, повисока за најмалку 50% од редовната и слободен ден во наредните седум дена – појасни премиерот.

Освен здравјето на луѓето, рече Премиерот, пандемијата загрози илјадници работни места.

– На прво место се работниците, обезбедивме поддршка да се зачуваат илјадници работни места. Работнте места на прво место беше главната цел, и задоволен сум што за оваа цел немавме противници. Имаме најнисок праг на невработеност – 16 проценти. Докажавме дека работниците се движечката сила на економијата и покрај ударот од пандемијата платите ќе продолжат да растат – рече Заев.

Министерот за економија, Крешник Бектеши, истакна дека денот недела ќе биде неработен ден за сите работници, освен за одредени исклучоци за кои ќе биде дозволено работењето во недела и на празници.

– Во недела ќе можат да работат продавници за продажба на сладолед, колачи, апетисани, цвеќиња, сувенири, филигранство, весници и цигари во туристичките места утврдени со Законот за туристичка дејност. Продавниците на бензиските станици, продавниците во трговските центри ќе можат да работат само една смена, а истото важи за продавниците за трговија на мало со храна, пијалаци и тутун, како и во зелените пазари. Со овој закон е предвидено додатокот на плата за работа во недела ќе изнесува 100 проценти за секој час поминат на работа во недела и за празници. Исто така, за трговските субјекти кои ќе работат во недела се утврдува надоместок од 2 отсто од вкупниот приход остварен минатата година во недела и на празници, а тие средства ќе се инвестираат во детски градинки – рече Бектеши.