Во градската чаршија во Струга затворени се девет новогодишни куќарки, кои не ги исполнувале основните хигиенски услови. Како што соопшти Агенцијата за храна и ветеринарство (АХВ), куќарките не биле поврзани на градската водоводна мрежа, немале спроведено задолжителна дезинфекција, дезинсекција и дератизација, а лицата кои работеле во нив немале извршено здравствено-санитарни прегледи.

По спроведен инспекциски надзор, АХВ им изречени парични казни од по 200 евра на угостителите, а издадени се и налози за нивна регистрација во Агенцијата како оператори со храна.

– Со контролата спроведена на 22-ри овој месец, утврдено е дека во куќарките работеле физички лица и тоа во нехигиенски услови, односно куќарките не биле поврзани на градската водоводна мрежа, немале спроведена задолжителна дезинфекција, дезинсекција и дератизација, лицата немале спроведени задолжителни здравствено – санитарни прегледи, а не се почитувале ниту правилата на добра производствена и добра хигиенска пракса – информира АХВ.

Решенијата за времена забрана за вршење дејност ќе останат во сила до исполнување на потребните услови за работа.