Во првиот меч по триумфот на Австралија Опен, Ѓоковиќ подобар од Синер
Новак Ѓоковиќ по двомесечна пауза се врати на тениските терени и обезбеди пласман во осминафиналето на мастерсот во Монте Карло откако во второто коло го совлада Јаник Синер во два сета и тоа со 6:4,6:2.
Ова беше прв меч на Ѓоковиќ по триумфот на Австралија Опен во февруари, и успеа да оствари лесен триумд иако против себе го имаше финалистот од мастерсот во Мајами.
На стартот од мечот и двајцата тенисери се обидуваа да го пронајдат ритамот, поагресивен беше младиот Италијанец и во третиот гем направи брејк. Сепак, Ѓоковиќ одговори експресно во наредниот гем, а потоа повторно го одзеде сервисот на противникот и поведе со 5:2. Но, кога сервираше за сет, падот на концентрацијата му дозволи на Синер да ги искористи своите шанси и да намали на 5:4. Но, во наредниот гем, првиот тенисер на АТП ранг листата повторно прави брејк кој му носи водство од 1:0 во сетови.
Во вториот сет, клучен беше четвртиот гем кога Ѓоковиќ го одзеде сервисот на противникот и си го трасира патот до победата. Нареден противник на Ѓоковиќ ќе му биде подобриот од дуелот Хуркач – Еванс.
Сигурен старт на мастерсот во Монте Карло имаа и Григор Димитров, Фабио Фоњини, Андреј Рубљов кои славеа во два сета, додека изненадувачки поразен е Диего Шварцман кој загуби од Норвежанецот Руд со 3:6,3:6.