Иако во голем дел од светот Божиќ се слави како верски и културен празник, во одредени земји неговото јавно одбележување е забрането или сериозно ограничено. Причините се различни – од авторитарни политички режими и строги верски закони, до отпор кон западното културно влијание, пишува „Бљесак.инфо“.

Во продолжение следува преглед на земјите каде што Божиќ не смее слободно да се слави.

Северна Кореја

Во Северна Кореја Божиќ е целосно забранет бидејќи државата не дозволува никаква форма на организирана религија. Христијанството се смета за закана за култот на личноста на семејството Ким, а оние што се обидуваат да го одбележат Божиќ може да бидат строго казнети.

Наместо Божиќ, властите го промовираат роденденот на Ким Џонг-сук, бабата на сегашниот лидер Ким Џонг-ун, кој се одбележува на 24 декември. Денот на 25 декември е целосно исполнет со државни манифестации, како масовни танци, концерти и организирани посети на нејзини споменици. Секое христијанско одбележување се смета за сериозно кршење на законот.

Саудиска Арабија

Во Саудиска Арабија јавното славење на Божиќ не е дозволено поради строгото толкување на исламот врз кое се темели правниот и општествениот систем на земјата.

Божиќни украси, јавни богослужби и празнични прослави се забранети. Странските христијани можат да го одбележат празникот само приватно, во своите домови или во дипломатски кругови, без јавно истакнување верски симболи.

Сомалија

Властите во Сомалија го забранија јавното одбележување на Божиќ, со образложение дека тоа не е во согласност со исламската вера и традицијата на земјата. Забраната се оправдува и со безбедносни причини, бидејќи екстремистички групи во минатото се заканувале со напади за време на христијански празници.

Поради заканите од групи како Ал-Шабаб, секој јавен облик на празнување е не само незаконски, туку и опасен. За малубројните христијани во земјата, 25 декември поминува тивко и скриено.

Брунеј

Во Брунеј од 2015 година е забрането јавното славење на Божиќ. Властите сметаат дека јавното одбележување на христијанските празници може да влијае врз муслиманското мнозинство.

Христијаните имаат дозвола да го слават Божиќ само во затворени простории и без видливи јавни симболи или прослави.

Таџикистан

Во Таџикистан ограничувањата за Божиќ се поврзани повеќе со државната политика отколку со религијата. Иако населението е претежно муслиманско, причината е контролата врз странските и западни културни влијанија.

Божиќни елки, подароци и ликот на Дедо Мраз се забранети во училиштата и државните институции. Црквите можат да одржуваат скромни богослужби, но јавни прослави не се охрабруваат. Затоа, 25 декември минува речиси незабележано.

Кина

На национално ниво Божиќ не е забранет во Кина, но во одредени градови и региони локалните власти повремено воведуваат ограничувања за божиќни украси и јавни прослави.

Целта е намалување на западното културно влијание и промовирање на домашните традиции, а најчесто овие мерки се применуваат во училиштата и универзитетите.