Во куќата што ја купиле, пронашле богатство вредно половина милион евра – Парите ќе завршат во општинската каса
Општината Морез во источна Франција неодамна купила куќа за 130.000 евра, а во стаклени тегни во внатрешноста пронашле повеќе од илјада златници и пет златни плочки во вредност од 500.000 евра, пренесе денес Ле Паризијен.
Кога градоначалинот на Морез, Лорен Пети, го објави пронаоѓањето на вредносто богатство, предизвика воодушевување кај населението и градските власти, бидејќи буџетот на градот сега е поголем за половина милион евра.
Морез е градче со 5.000 жители, а општината случајно ја купила токму таа куќа во центарот на градот, со желба да ја обнови и да направи две продавници на приземјето, а на горните два ката станови, пишува Ле Паризијен.
Куќата била во лоша состојба, преполна со разни предмети – имало се, од кутии, стари чорапи, до искористени пластични кутии и сл.
– Кога започнавме да ја средуваме куќата, во око ми падна вториот кат. Наидов на пластична вреќа полна со лименки и стари стаклени тегли од кисели краставички. Сфатив дека лименките се полни со пари кованици, но не ја знаев нивната вредност. Тогаш ги здогледав и златните плочки и срцето ми затрепери. Плочките и кованиците со децении ги чувало семејството Жобез – изјави Мартин Ријалан, која работи во општината.
Кога починал последниот член на семејството Жобез, кое немало наследници, далечните роднини ја наследиле куќата и одлучиле да ја продадат, не сфаќајќи какво богатство се крие внатре, додава Ле Паризијен.