Кога се подготвуваат за лет, повеќето патници најчесто размислуваат за удобноста, но експертите предупредуваат дека изборот на облека може да има значење и од безбедносен аспект. Одредени парчиња гардероба, кои изгледаат практични за патување, во итни ситуации можат да создадат дополнителни проблеми, пишува „Менс џурнал“.

Експертите за авијациска безбедност советуваат да се избегнува облека од синтетички материјали, особено тесни хеланки, спортски панталони и друга облека направена од вештачки влакна. Кристин Негрони, авторка на книга за авионски несреќи и експерт за безбедност во воздухопловството, предупредува дека ваквите материјали при пожар можат да се стопат и да предизвикаат сериозни изгореници.

„Денес сите носат јога хеланки во авионите, но јас избегнувам секакви вештачки влакна бидејќи постои поголема веројатност тие да изгорат и да се залепат за вас доколку избие пожар. Би ви препорачала да носите памучна облека или нешто направено од природни влакна“, изјавила Негрони за „Сан травел“.

Таа објаснува дека во многу авионски несреќи најголемата опасност не е самиот удар, туку тоа што може да се случи по него, особено доколку дојде до пожар поради горивото во леталото. Ако облеката се стопи и се залепи за телото, патниците можат да имаат дополнителни повреди и потешкотии при евакуација.

Тесната облека и обувките можат да создадат проблем

Проблем можат да бидат и тесните фармерки или друга облека што го ограничува движењето, особено при долги летови. Долготрајното седење, во комбинација со тесна гардероба, може да ја отежне циркулацијата на крвта и да го зголеми ризикот од создавање крвни згрутчувања.

Експертите советуваат патниците да избегнуваат и кратки панталони и кратки здолништа. Поранешен вработен во „Emirates Airlines“ предупредува дека во случај на евакуација преку лизгалка, изложената кожа може да биде во директен контакт со материјалот на лизгалката, кој се движи со голема брзина и може да предизвика повреди или изгореници.

Од слични причини не се препорачува ниту носење апостолки и обувки со високи потпетици. Таквата обувка може да го отежне брзото движење и евентуалната евакуација, а високите потпетици можат да бидат непрактични во итни ситуации.

Не се препорачуваат ниту костими за капење и контактни леќи

Иако патниците што патуваат кон топли дестинации често сакаат да се облечат што полесно, експертите советуваат да не се патува во костими за капење. Тие не нудат доволна заштита и не се најсоодветен избор за подолг престој во авион.

Внимание се препорачува и кај лицата што носат контактни леќи. Воздухот во кабината е сув, а ниската влажност може да предизвика сувост и иритација на очите, чешање и заматен вид.

Посебно правило важи и за преносливите батерии, односно надворешните батерии. Тие треба да се носат исклучиво во рачниот багаж поради ризикот од прегревање и евентуален пожар.

Експертите нагласуваат дека никој не очекува итна ситуација за време на лет, но изборот на облека што е удобна, практична и изработена од соодветни материјали може да направи голема разлика доколку се случи нешто непредвидено.

Кои седишта во авион се најдобри за долги патувања