По целиот ден поминат на плажа, повеќето луѓе имаат навика само да го истресат песокот од пешкирот и да го вратат во торбата или во автомобилот. Но, токму оваа постапка може да доведе до непријатни мириси и побрзо оштетување на ткаенината.

Експертите предупредуваат дека во пешкирот по престојот на плажа не остануваат само зрнца песок и морска вода. Се задржуваат и пот, сол, остатоци од креми за сончање, масла за тело и други нечистотии, па затоа правилното одржување е важно за да остане свеж и мек.

Најголемата грешка е да го оставите влажен во торба

Пешкирот не мора да се пере по секое одење на плажа, но не треба долго да остане влажен и затворен во торба или во багажникот на автомобилот.

Топлината и влагата создаваат идеални услови за развој на бактерии и појава на непријатни мириси. Иако многумина мислат дека токму песокот е причината за непријатниот мирис, вистинскиот проблем најчесто е тоа што пешкирот не се исушил доволно брзо.

Затоа, веднаш штом ќе стигнете дома или во сместувањето, извадете го од торбата, раширете го и оставете го целосно да се исуши.

Добро истресете го пред перење

Пред да го ставите пешкирот во машина за перење, добро истресете го надвор. Ако е натопен со вода и има многу песок, најдобро е прво да го оставите да се исуши, бидејќи сувиот песок многу полесно се отстранува.

На тој начин ќе спречите песокот да заврши во барабанот на машината или во нејзините други делови, каде што може да предизвика проблеми.

Солта и кремите за сончање остануваат во ткаенината

По цел ден на сонце, пешкирот во себе задржува траги од морска сол, креми за сончање, масла за тело и пот.

Ако истиот пешкир само го сушите и повторно го користите неколку дена, со текот на времето може да стане погруб, да ја изгуби свежината и да добие непријатен мирис.

Колку често треба да се пере зависи од начинот на користење. Доколку постојано останува влажен, го користат повеќе луѓе или е видливо извалкан, подобро е да се испере и во текот на летувањето, а не само по неговото завршување.

Не ја заборавајте и торбата за плажа

Не треба да се чисти само пешкирот. И торбата за плажа често собира песок, сол и влага, особено ако секојдневно во неа се ставаат мокри костими за капење и влажни пешкири.

Повремено испразнете ја, добро истресете ја и исчистете ја според упатствата на производителот. Пред повторно да ја користите или да ја складирате, проверете дали е целосно сува.

Само неколку минути посветени на правилно сушење и одржување можат да помогнат пешкирите и торбите за плажа подолго да останат чисти, меки и подготвени за следното летно уживање.

ВИДЕО | Кој прв стигне, негово? Турист во Црна Гора отиде чекор подалеку, место на плажа си „резервирал“ со тепих