Живот на активен вулкан — ова е необичен остров каде што живеат само 170 луѓе во изолација
Скриен во Филипинското Море, околу 350 километри јужно од Токио, Аогашима е еден од најнеобичните населени острови во Јапонија. Создаден по голема вулканска ерупција пред неколку векови, тој е уникатен по тоа што неговите жители живеат во средината на вулкански пејзаж, во непосредна близина на активен вулкан.
Препорачано
На островот живеат околу 170 жители, опкружени со бујна вегетација, топли извори и стрмни карпи што се спуштаат во морето. Островот Аогашима е долг околу 3,5 километри и широк 2,5 километри, пишува „Пун куфер“.
И покрај изолацијата и активното вулканско минато, жителите изградиле мирен и одржлив начин на живот. Геотермалната енергија од вулканот се користи за греење и готвење, додека повеќето се занимаваат со земјоделство и риболов. На островот има модерно основно училиште и пошта, која е отворена дури и во сабота и за време на државните празници.
View this post on Instagram
Но, до Аогашима не е лесно да се стигне. Прво, треба да стигнете до островот Хачиџоџима со авион или брод (патувањето трае околу 11 часа), а потоа да го продолжите патувањето со хеликоптер, кој лета еднаш дневно и пристигнува за околу 20 минути, или со брод, кој работи три до четирипати неделно, но само кога временските услови дозволуваат.
Бидејќи малку туристи одлучуваат да го посетат ова оддалечено место, мештаните секогаш им пружаат топло добредојде. Шетајќи низ островот можете да видите куќи скриени во зеленило, мали продавници за саке и традиционални јапонски ресторани – изакаја.
Особено познато е локалното шочу, јапонски алкохолен пијалак направен од сладок компир, кој често се служи со сашими (јапонски деликатес кој се состои од свежа сурова риба или друго сурово месо на тенки парчиња и често се јаде со соја сос ) и зачинет сос од црвена пиперка познат како шимадаре.
Посетителите можат да кампуваат во областа Икеносава или да престојуваат во миншуку, традиционален сместувачки капацитет во домовите на локалните жители, што овозможува автентично искуство од животот на островот.
Аогашима е една од најнеобичните туристички дестинации во Јапонија. Сепак, ако некогаш се решите да го посетите овој остров, оставете неколку дополнителни денови во вашиот распоред, бидејќи враќањето зависи целосно од времето.
View this post on Instagram
