Македонската тениска надеж во својот трет настап на јуниорскиот „Вимблдон“ претрпе пораз од седмиот носител Џек Пинингтон Џонс со 2:0.

После двете победи над стартот 17-годишниот Калин Ивановски го привлече вниманието со неговите игри и денешното осминафинале беше директно пренесувано на „Спортклуб 1“.

Во првиот сет нашиот тенисер се покажа како сериозна закана за Британецот особено со своите силни сервиси.

Имаше константно минимално водство во гемови, 2:1, 3:2, 4:3, а при 5:4 противникот успеа да направи пресврт серија на освоени гемови која не траеше само до завршувањето на првиот сет, туку и до крајот на самиот меч.

Во вториот сет Џонс ја продолжи својата серија на гемови, при негатива од 3:0 македонскиот тенисер се пожали на повреда на десната нога, по што беше принуден да побара медицински тајм-аут.

Делуваше дека поради повредата ќе го предаде мечот, но не се предаваше, до крај се бореше, на крајот најголемата британска надеж ја искористи можноста и обезбеди пласман во четвртфиналето со конечни 7:5 и 6:0.

Во следната фаза Пинингтон Џонс ќе игра против Виктор Лилов од САД кој со 2:0 (6:2, 6:1) го совлада Војтех Петр од Чешка.

Севкупно не треба да жалиме, Македонија има голем тениски бисер на кој треба особено да се внимава, се надеваме и во иднина Ивановски ќе ја претставува нашата земја на најголемите тениски собири.