Под јасно зимско сонце, воениот дел од Меѓународниот аеродром – Скопје во касарната „Страшо Пинџур“ денеска беше исполнет со детска радост и возбуда.

Армискиот „Дедо Мраз“ пристигна по краток прелет со транспортен воен хеликоптер од составот на воздухопловниот ВИНГ и им подели новогодишни подароци на најмладите.

Традиционалната манифестација, која со години ја организира оваа воздухопловна единица на Армијата, повторно собра голем број деца на припадници на Армијата и Министерството за одбрана, но и граѓани кои сакаа да присуствуваат на настанот.

Настанот и оваа година предизвика огромен интерес, а моментот на слетување на хеликоптерот беше дочекан со громогласен аплауз и детски извиците.

Присутна беше и претседателката Гордана Сиљановска-Давкова, која претходно заедно со министерот за одбрана Владо Мисајловски и началникот на Генералштабот, генерал Лафчиски, разговараше со припадниците на македонската армија кои се на мисија во странство.

Потоа им се придружи на присутните и го следеше настанот подготвен за најмалите.

Дедо Мраз, пристигнат со армиски транспортен хеликоптер, успеа да израдува стотици деца кои со нетрпение го очекуваа моментот да го видат, а потоа и да ги добијат своите подароци.

Детската еуфорија и насмевките доминираа на просторот, оставајќи силна празнична атмосфера во касарната.