Огромни количества ѓубре, пластични шишиња, ќеси и разни други отпадоци „течат“ денеска по Вардар во Скопје, како сите диви депонии од околината да завршиле во неговите води.

Не дека реката е некогаш чиста, редовно кај столбовите на мостовите, кај галиите и фонтаните сместени во Вардар се собира отпад, но она што денеска се случуваше е ужасно и уште еден доказ дека никој не се грижи за животната средина – ниту граѓаните, ниту надлежните институции.

Град Скопје пред некоја година се пожали дека ѓубрето во Вардар доаѓа од дивите депонии што се наоѓаат во горниот тек, покрај неговото корито. Од тогаш до сега многу матна вода протече низ реката, но очигледно никој не се ангажираше да ги исчисти депониите и да изрекува сериозни казни за секој кој со своите постапки ја загадува околината и реката.

Пластичните амбалажи што пловат по реката исто така говорат за еколошката – свест на некои граѓани, оти пластичните шишиња во реката не случајно се нашле таму.