Холивудскиот актер Џони Деп станал жртва на голема финансиска измама, откако 27-годишен државјанин на Јордан наводно украл податоци од неговата банкарска картичка и потрошил повеќе од 620 илјади евра, пренесува „Дејли мејл“.

Актерот повеќе од две години воопшто не забележал дека од неговата сметка исчезнуваат огромни суми пари. Сомнителните трансакции биле откриени дури кога банката ги означила како невообичаени и започнала истрага. Истражителите ги следеле интернет-нарачките и резервациите направени со картичката, а трагата ги одвела до маж кој изнајмувал стан во Будимпешта.

Унгарските власти тврдат дека осомничениот ги користел украдените податоци од кредитната картичка на Деп за интернет-купувања и резервации за сместување. Полицијата истражува дури 308 одделни трансакции, чија вкупна вредност надминува 620 илјади евра.

На снимките што ги објави унгарската полиција се гледа моментот на апсењето, кога полицајците го приведуваат осомничениот со лисици на рацете.

Според истражителите, случајот бил отворен на почетокот на годинава, кога американска финансиска институција го контактирала унгарското биро на Федералното истражно биро поради нелегални исплати од сметка на нивен клиент. Подоцна било утврдено дека станува збор токму за Џони Деп, кој, според медиумите, не забележал стотици трансакции направени помеѓу јануари 2024 и декември 2025 година.

Полицијата трагата на парите ја следела преку интернет-адреси, електронски пошти и унгарски телефонски број поврзан со резервациите направени со украдената картичка.

При претресот на станот, полицијата запленила електронски уреди за кои се сомнева дека биле користени во измамата. Во станот биле пронајдени и супстанции за кои постои сомнеж дека се наркотични средства, поради што против осомничениот е отворена дополнителна истрага за можно поседување дрога. Истражителите велат дека осомничениот ги негира обвиненијата, но судот сепак му одредил истражен притвор.

Полицијата сè уште се обидува да утврди како биле украдени податоците од картичката на Џони Деп. Меѓу можните сценарија се споменуваат кражба на податоци, протекување информации или компромитирана интернет-трансакција од минатото.

Џони Деп во последните години често престојувал во Будимпешта поради снимање различни проекти, а унгарската полиција соопшти дека истрагата сè уште трае и дека не се исклучени нови апсења.