ВИДЕО: Тенискиот „бомбардер“ кој го одигра најдолгиот меч во историјата заминува во пензија
Американецот Џон Изнер (38), кој го одигра најдолгиот тениски меч до сега на „Вимблдон“ во 2010 година, изјави дека ќе се повлече од професионалниот тенис откако ќе настапи на овогодинешниот „УС Опен“.
Пред 13 години на „Вимблдон“, Изнер го победи Французинот Никола Мау со 6:4, 3:6, 6:7 (9), 7:6 (3), 70:68 во 11-часовен епски меч кој траеше три дена.
– По повеќе од 17 години на АТП турнирите, време е да се збогувам со професионалниот тенис. УС Опен ќе биде мојот последен турнир – напиша Изнер на Инстаграм.
Беше четвртфиналист на „УС Опен“ во 2011 и 2018 година. Тој е најдобриот сервер на сите времиња на АТП турнејата со 14,411 асови и беше најдобро рангиран Американец девет последователни години од 2012 до 2020 година, завршувајќи ја сезоната во топ 20 во АТП првите 10 години, од 2010 до 2019 година.
Тој освои 16 АТП титули во сингл и осум во двојки.