Ракометниот клуб Еурофарм Пелистер забрзано го комплетира составот кој следната сезона ќе игра во ЕХФ Лигата на шампионите.

По заминувањето на седум играчи, стручниот штаб предводен од Звонко Шундовски и Ацо Јовиќ бара адекватни замени, а на почетокот на преодниот рок во центарот на вниманието се играчите од овие простори.

По потписот на искусниот словенечки десен бек Нејц Цехте, сега погледите се насочени кон српскиот репрезентативец Марко Милосављевиќ (25), дознава „Балкан-Хандбал“.

Белграѓанецот кој блескаше во репрезентативниот дрес на СП 2023 е блиску до договор со македонскиот шампион.

Главното прашање е висината на обештетувањето што Македонците ќе треба да му го платат на шпанскиот клуб Адемар Леон, во кој левиот среден бек ја игра втората сезона.

Квалитетот на Милосављевиќ и во офанзива и во дефанзива е непобитен, како и потенцијалот да оди на повисоко ниво. Во тоа може да му помогне сезоната на играње во најквалитетното европско натпреварување.