По долга и емотивна борба со болеста, пејачката Џеси Џеј објави дека повеќе нема рак, пренесува „Ролинг стоун“. Таа ја сподели веста преку видео на социјалните мрежи, во кое ги прикажа моментите пред редовниот годишен лекарски преглед по магнетната резонанца на дојките. Во описот на објавата радосно напиша:

„Резултатите пристигнаа и јас немам веќе рак! Плачев со часови, а потоа за првпат по една година навистина почувствував олеснување.“

Џеси Џеј отворено зборуваше за својата здравствена состојба и за тешките, но и охрабрувачките моменти низ кои поминувала во текот на лекувањето.

Во јуни 2025 година, пејачката откри дека ѝ бил дијагностициран рак на дојка. Тогаш призна дека долго размислувала дали јавно да ја сподели веста, но на крај решила да биде искрена со своите обожаватели и со луѓето кои се грижат за неа.

Минатиот август ги откажа сите настапи во Соединетите Американски Држави од турнејата „Без тајни“, а концертите во Обединетото Кралство и Европа ги одложи поради втора операција.

Само еден месец подоцна, Џеси Џеј повторно се појави на сцена по хируршкиот зафат. Настапот бил особено емотивен, бидејќи за првпат нејзиниот двегодишен син ја гледал како пее во живо.

„Не можете ни да замислите колку сум благодарна што сум овде и што ве гледам како пеете со мене по сите овие години“, им рекла таа на присутните на фестивалот на „Би-би-си Радио 2“ во Есекс.

Пред да ја изведе новата песна „Живеам најдобар живот“, Џеси Џеј објаснила зошто токму таа песна има посебно значење за неа.

„Некои од вас можеби знаат, а некои не, но ракот ми беше дијагностициран буквално две недели пред песната да биде објавена. Сите ми велеа: ‘Да запреме, да ставиме сè на пауза’, а јас реков: ‘Тоа не е суштината на животот.’“

Таа додала:

„Животот значи да стоиш среде бура, но да го држиш чадорот и да продолжиш напред.“

Потоа им се обратила на обожавателите со емотивна порака:

„Оваа песна се вика ‘Живеам најдобар живот’ и токму така живеам секој ден. Никогаш не знаеме кога ќе ни биде последниот ден, затоа уживајте во секој миг и силно прегрнете ги луѓето што ги сакате.“

Во ноември пејачката го објави албумот „Не ме предизвикувај со добро време“, нејзин прв музички проект по осум години и прво издание откако ја прекина соработката со издавачката куќа „Рипаблик Рекордс“. Новата музика ја објави преку продукцијата „Ди-Еј-Пи“ и сопствената музичка етикета именувана по неа.