И натаму се зборува за „фантомскиот гол“ на Кристијано Роналдо во мундијалските квалификации, а цехот го плати помошникот на главниот судија кој не виде дека топката ја помина гол-линијата. Тој доби отказ и според најавите нема да суди на Европското првенство.

Судијата Марио Дикс беше еден од двајцата асистенти на Дани Макели на мечот во Белград помеѓу Србија и Португалија. Тој не виде дека топката ја помина гол-линијата, а главниот судија сега ја прекина соработката со него, пишуваат холандските медиуми.

– Многу сум разочаран што нема да бидам дел од Европското првенство. Макели ми рече на 31 март дека би сакал да продолжи со друг асистент затоа што повеќе не верува во нашата соработка. Очекував друг вид на поддршка, разбирање и верба – рече Дикс.

Информацијата ја потврди и главниот судија Макели, кој не ги спомена причините за заминувањето на сегашниот помошник.

– Вистина е дека Јан де Врис ја презеде позицијата на Марио Дикс во нашиот тим. Тоа е внатрешна работа. Апсолутно го почитуваме Марио, но кога станува збор за интересите на судискиот тим, нема да дадеме изјави за причини за промената – се зборовите на Макели.

Натпреварот Србија-Португалија заврши 2:2, а Роналдо во финишот од мечот од гнев ја фрли капитенската лента и го напушти теренот. Португалскиот селектор Фернандо Сантош подоцна изјави дека Макели се извини за својата грешка по натпреварот.