Автомобилот Ситроен 2ЦВ, кај нас познат како „Спачек“, е еден од оние автомобили што одамна прераснаа во легенда. Тој беше едноставен, лесен, бавен и неверојатно практичен, а токму поради тоа стана еден од најголемите европски автомобилски симболи. Додека „Фолксваген Буба“, „Мини Купер“ и „Рено 4“ веќе добија современи верзии, „Спачек“ со децении остана без вистински наследник. Сега тоа конечно би можело да се промени.

Првиот човек на „Ситроен“, Ксавије Шардон, потврди за време на претставувањето на идните планови на компанијата „Стелантис“ дека брендот развива нов 2ЦВ. Не се работи само за носталгична идеја, бидејќи „Ситроен“ веќе прикажа прв тизер на автомобилот.

Новиот модел нема само да го носи старото име, туку со дизајнот директно ќе потсетува на оригиналот. Се препознаваат заоблениот преден дел, позицијата на светлата и основната форма на каросеријата што го потсетува на легендарниот „Спачек“.

Новиот „Спачек“ треба да биде мал електричен автомобил развиен според идните европски правила за таканаречената „Е кар“ односно „М1Е“ категорија на возила. Целта е да се овозможи производство на поедноставни, полесни и значително поевтини електрични автомобили кои нема да мора да ја имаат целата технологија што е задолжителна кај класичните возила.

„Ситроен“ најавува и цена под 15.000 евра, што новиот 2ЦВ би го сместило меѓу најевтините електрични автомобили во Европа.

Токму цената е клучот на целата приказна. Електричните автомобили во последните години станаа технолошки понапредни, но за голем број купувачи сè уште се прескапи. Европа затоа сè посериозно се обидува да најде одговор на евтините кинески градски модели, но и на фактот дека некогаш достапните мали автомобили речиси исчезнаа од пазарот.

Ако новиот „Спачек“ навистина успее да остане под границата од 15.000 евра, би можел да стане еден од најважните модели на „Ситроен“ во новата електрична ера.

Секако, ниската цена ќе значи и одредени компромиси. Се очекува поскромна моќност, ограничена максимална брзина и поедноставена конструкција. Новите европски правила за „М1Е“ возила би можеле да овозможат и нешто поблаги безбедносни барања за автомобилите да останат полесни и попристапни.

Тоа практично значи дека новиот „Спачек“ најверојатно нема да биде целосна замена за класичен автомобил, туку едноставно електрично возило наменето за секојдневно градско возење и пократки релации.

„Ситроен“ новиот 2ЦВ официјално ќе го претстави во октомври на саемот за автомобили во Париз, кога ќе биде познато дали станува збор за сериски модел или концепт многу близок до производство.