ВИДЕО | Калиопи за денешната естрада: Секој може да наполни арена, не можат да ме купат новите трендови
Македонската пејачка Калиопи Букле беше гостинка во емисијата „Исповеди“ на „Тв Република“ каде отворено коментираше за денешната естрада и новите музички трендови, пишува „Република“.
Таа вели дека во денешно време секој може да полни арени и големи сали, бидејќи сега музиката е многу покомерцијална од порано. Во емисијата, пејачката исто така зборуваше како останала доследна на својот стил и правец во музиката и дека често одбивала да снима дуети со колегите.
„Останав верна на мојот музички правец затоа што сакам да правам музика според мојот сензибилитет. Не можат да ме купат новите трендови и жанрови кои се популарни, ама очигледно има многу луѓе, всушност млади луѓе, кои ги слушаат. Денес секој може да наполни арена, стана нормално, но порано беше вистинска реткост“, вели Калиопи.
Калиопи откри и зошто избегнува да снима дуети со колегите.
„Не сакам да снимам дуети, некако тоа не е мој стил. Имаше понуди од колеги, ги одбив сите, не затоа што го кренав носот, туку затоа што не се гледам себеси во тоа“, додава таа.
Инаку, Калиопи неодамна го откажа концертот во Белград бидејќи жена од публиката ненадејно почина откако ѝ се слошило. Пејачката изрази сочувство до семејството и најави дека купените влезници за овој спектакл ќе важат и за новиот термин кој ќе биде дополнително објавен.