Со пораки „Ве сакаме такви кави што сте, знамиња и симболи во боите на виножитото и под слоганот „Сите нека знаат“ од Фонтаната „Лотос“ во Градскиот парк во Скопје започна осмата Парада на гордоста. Организаторите велат дека оваа година слоганот ја истакнува потребата од видливоста, но и сите недостатоци на системот којшто ги наметнува со видливоста.

Тие нагласуваат дека овогодинешниот марш има строго протестен карактер, како одговор на зголемениот притисок и обидите за институционално невидливеење на ЛГБТИ+ заедницата.

Годинава маршот се движи по проширена и исклучително видлива маршрута низ централните градски сообраќајници.

Маршрута на движење – Поворката ќе се движи по булеварот „Илинден“, ќе сврти лево по улицата „Рузвелтова“, па десно по булеварот „Партизански одреди“, продолжува по булеварот ВМРО и по улицата „Димитрие Чуповски“.

Крајна точка – Маршот ќе заврши во паркот „Жена-борец“, веднаш наспроти Собранието.

За разлика од претходните години, организаторите решија самиот марш да нема забавен дел со бина и со музичка програма на крајната точка. Настанот е фокусиран исклучиво на гласен протест за клучните барања: итно носење на Законот за матична евиденција (правно признавање на родот), заштита од насилство и крај на говорот на омраза.

Иако самиот марш е строго протестен, прославата и солидарноста на заедницата се префрлаат на официјалната вечерна забава во 21 часот во културниот центар „Лабораториум“.