Светското првенство кое се одржува во САД, Канада и Мексико продолжува да отвора прашања за третманот на учесниците при влез во земјите, посебно во САД, но сега се појави и слична ситуација од Канада.

Наместо поедноставени процедури за националните селекции кои пристигнуваат како официјални учесници на најголемиот фудбалски настан, дел од репрезентациите се соочуваат со строги безбедносни контроли на граничните премини и аеродромите.

Последен таков случај е репрезентацијата на Германија, која денеска во Канада треба да се соочи со Брегот на Слоновата Коска. Според информациите од германските медиуми, фудбалерите и членовите на делегацијата биле подложени на детални проверки при влезот во земјата.

Контролите биле исклучително темелни, што предизвикало незадоволство кај дел од јавноста, особено ако се земе предвид дека станува збор за спортисти кои престојуваат во земјата исклучиво поради настапот на Светското првенство.