Големиот топлотен бран што го зафати поголемиот дел од Европа ги вознемири службите во Франција и Германија и им донесе неволји на туристите и жителите во Италија, бидејќи температурите достигнаа рекордни нивоа, јавуваат медиумите.

Францускиот премиер Себастијан Лекорну треба да одржи итен состанок во сабота откако националната метеоролошка агенција Метео Франс предупреди дека топлотниот бран ќе трае до следната недела, споредувајќи го со топлотните бранови во 2003 и 2019 година.

Вистинска летна жештина — западна Европа се соочува со рекордно високи температури во мај

Температури од 39 до 40 степени Целзиусови се прогнозираат од југозапад до парискиот регион до недела, а во некои области ќе се искачат до 41°C.

Се очекува температурите да достигнат врв во понеделник и би можеле да се изедначат со историските максимуми. Предупредувања за топлина се издадени и во Германија за речиси целата земја, со температури близу 38°C. Метеоролошката служба DWD предупреди дека комбинацијата од топлина и влажност може да предизвика силни грмотевици.

Од другата страна на Алпите, температурите што можеа да достигнат 36 или 37 °C го нарушија секојдневниот живот во Италија и го уништија престојот на многу посетители во земјата.

„Топлoтната купола“ доаѓа во Европа, какво влијание ќе има на времето во Македонија?

Туристите чекаа на жешкото сонце пред Колосеумот, што се покажа како тест за издржливост во римската жештина. Некои бараа олеснување во постудените подземни простори под остатоците од Храмот на Клавдиј.

Во Болоња, град на север и еден од најжешките на Апенинскиот полуостров, луѓето прскаа вода по лицата кај централната фонтана Нептун од 16 век.

Научниците велат дека климатските промени ги прават топлотните бранови почести и поинтензивни низ Европа, зголемувајќи го ризикот од здравствени шокови и економски нарушувања во текот на летните месеци.

Економското влијание на екстремната топлина исто така расте. Гувернерот на Банката на Франција, Емануел Мулен, предупреди за нејзините краткорочни ефекти, наведувајќи ја намалената продуктивност и зголемената потрошувачка на енергија, додавајќи дека топлотните бранови ќе влијаат врз економската активност на среден рок.