Развојот на вештачката интелигенција носи бројни придобивки, но истовремено отвора и нови предизвици. Еден од нив е сѐ поголемата тешкотија кај корисниците да препознаат дали содржината што ја гледаат на интернет е создадена од човек или е генерирана со помош на вештачка интелигенција.

На тоа предупредуваат резултатите од ново истражување спроведено меѓу 1.500 испитаници во Австрија, Велика Британија, Германија, Швајцарија и САД, кои покажуваат дека границата меѓу реалната и вештачки создадената содржина станува сѐ понејасна, пренесува „Портал“.

Речиси девет од десет луѓе не можат да ја препознаат разликата

Според истражувањето на компанијата за сајбер-безбедност „Малвербајтс“, дури 88 отсто од испитаниците изјавиле дека им е сѐ потешко да утврдат дали одредена содржина на интернет е навистина создадена од човек или е генерирана со помош на вештачка интелигенција.

Речиси идентичен процент од анкетираните рекле дека имаат потешкотии да разликуваат измами од автентична содржина.

Истражувањето покажува и значително влошување во споредба со минатата година. Додека тогаш 66 отсто од испитаниците изјавиле дека имаат проблем да ја препознаат разликата меѓу вистинска и лажна содржина, годинава тој процент пораснал на дури 88 отсто.

Измамниците сѐ почесто ја користат вештачката интелигенција

Секој четврти учесник во анкетата изјавил дека во последните 12 месеци добил персонализирана порака чија цел била измама.

Од „Малвербајтс“ предупредуваат дека измамниците сѐ почесто користат алатки базирани на вештачка интелигенција за злоупотреба на лични податоци и за искористување на довербата меѓу луѓето.

„Измамниците користат вештачка интелигенција за злоупотреба на личните податоци и односите изградени врз доверба, што дополнително го зголемува стравот од кражба на идентитет“, соопшти компанијата.

Според нив, сѐ пошироката употреба на разговорни системи базирани на вештачка интелигенција дополнително ја замаглува границата меѓу вистинското и лажното.

Корисниците стануваат повнимателни на интернет

Како што расте недовербата кон содржините што се појавуваат на интернет, сѐ повеќе луѓе стануваат претпазливи кога станува збор за споделување лични информации и објавување содржини на социјалните мрежи.

Повеќе од три од пет испитаници изјавиле дека почнале поретко да ги користат социјалните мрежи, да бришат постари објави и поретко да споделуваат информации за себе и за своите деца.

Овој тренд би можел да претставува предизвик и за големите компании кои управуваат со социјалните мрежи, бидејќи нивните деловни модели во голема мера се потпираат на податоците што корисниците ги споделуваат и на интересот на огласувачите за тие информации.

Границата меѓу реалноста и дигиталната илузија станува сѐ потенка

Резултатите од истражувањето укажуваат дека вештачката интелигенција не само што го менува начинот на кој се создава содржина, туку влијае и врз способноста на луѓето да проценат што е вистинито, а што не.

Во време кога лажните фотографии, видеа и пораки стануваат сѐ поубедливи, експертите предупредуваат дека критичкото размислување и проверката на информациите ќе бидат поважни од кога било досега.

Новинар во „Њујорк тајмс“ добил отказ бидејќи користел вештачка интелигенција за пишување текст