Европската ракета „Аријана 6“ беше успешно лансирана во вселената во средата со нови, помоќни мотори. Ракетата полета од Европскиот вселенски центар во Куру, Француска Гвајана, на која беа поставени дури 36 сателити за „Амазон“, со што постигна нов европски рекорд за најголем товар пренесен во вселената со едно лансирање, пишуваат странските медиуми.

„Аријана 6“ е наследник на „Аријана 5“, која беше во употреба од 1996 до 2023 година. Првото лансирање беше во средината на 2024 година.

Наменета е за носење сателити во вселената за комерцијални и јавни корисници и е значително поевтина од својот претходник, соопшти Европската вселенска агенција (ЕСА).

Во зависност од мисијата, флексибилната ракета може да биде опремена со два или четири бустери на цврсто гориво.

Претходно летала со мотори P120C, но овој пат ракетата е опремена со помоќните модели P160C. Моторот P160C може да носи повеќе цврсто гориво, што ја прави ракетата поспособна.

Во изградбата на „Аријана 6“ беа вклучени повеќе од десет земји. По Франција, Германија е втор најголем придонесувач меѓу земјите-членки на ЕСА и покри околу 20 проценти од трошоците од околу 4 милијарди евра.

Горната фаза беше склопена во Германија, а главните компоненти и моторните системи беа исто така произведени и тестирани во германски погони.