Познатата готвачка Алекс Гуарнашели открила едноставен трик со кој хамбургерите стануваат омилени кај сите генерации и се уживаат во секоја прилика. Нејзината „тајна состојка“, која изненадувачки ја подобрува смесата од мелено месо, е мајонез. Таа вели дека секогаш го додава во смесата пред печење, а гостите редовно ги фалат нејзините бургери, пренесува „Кичен“.

Зошто токму мајонез?

Готвачката објаснува дека една лажица мајонез во смесата за плескавици прави голема разлика во вкусот. Кремастите ноти и благиот вкус на јајце од мајонезот го нагласуваат подлабокиот и побогат вкус на говедското месо, тврди таа. Покрај тоа, мајонезот придонесува за дополнителна сочност на бургерите. Сепак, таа нагласува дека овој трик не е замена за правилна подготовка, бидејќи клучот за сочен хамбургер и понатаму е во тоа да не се препече месото.

Реакции од гостите

Готвачката вели дека најмногу ја радува реакцијата на гостите кога по првиот залак со изненадување ја прашуваат што има во рецептот. Токму такви реакции, според неа, се случуваат со овие бургери.

„Луѓето често ме прашуваат: што стави во ова?“, вели таа, додавајќи дека редовно добива пофалби за сочноста и богатиот вкус.

„Ова е еден од оние трикови каде една состојка завршува голем дел од работата наместо готвачот. Што може да биде подобро од тоа?“, заклучува Гуарнашели.

Едноставна подготовка

Подготовката е многу едноставна. На околу половина килограм мелено говедско месо се додава една полна лажица мајонез. Важно е смесата да не се меша предолго за месото да не стане тврдо при печење. Откако состојките лесно ќе се соединат, се формираат плескавици по желба.

Гуарнашели понекогаш додава и неколку капки лут сос, кој не дава острина, туку само дополнителна длабочина на вкусот. Пред самото печење, доволни се сол и бибер, бидејќи, како што вели таа, нема потреба од претерување со зачините.

Потекло на хамбургерот

Хамбургерот во современата форма најчесто се поврзува со крајот на 19 и почетокот на 20 век во Соединетите Американски Држави. Иако постојат повеќе тврдења за неговото потекло, најшироко прифатено е дека првите „плескавици меѓу две парчиња леб“ се појавиле на американски саеми и во ресторани кои биле инспирирани од германските доселеници од градот Хамбург, по кој и го добил името.

Една од најчесто споменуваните приказни го поврзува создавањето на модерниот хамбургер со Светскиот саем во Сент Луис во 1904 година, каде што јадењето станало популарно меѓу пошироката јавност. Подоцна, во почетокот на 20 век, хамбургерот станал стандардна брза храна во САД.

Рецепт за полнети и похувани „бургери“ од палента кои ќе ги обожава целото семејство