Гастрономско уживање од вештите раце на Бобе Јанкоска: Бела торта со јагоди
Јованка Јанкоска Бобе, која стои зад блогот bobesbakery.mk, фејсбук и инстаграм-профилот, е вистински кулинарски креативец – нејзините рецепти се милина и за очите и за непцето.
Препорачано
Бобе денеска споделува рецепт за вистински гурмански деликатес – бела торта со јагоди.
– За да создадете вкусна торта и да се изненадите со вкусот и изгледот следете ги чекорите на подготовка. Оваа ледена бела торта е од повеќе слоеви. Како сендвич со песоклива подлога и завршница од мелени бадеми и бисквити натопени со путер. Средината освежителна, млечна и пенеста од маскарпонето и слатката павлака со неодолив шмек од белото чоколадо што во комбинација со свежите јагоди, ќе ги развесели вашите сетила. Пробајте за да ги доживеете овие задоволства – порачува Бобе.
Состојки:
– 500 грама маскарпоне
– 250 мл слатка павлака
– 100 грама бело чоколадо
– 500 грама свежи јагоди
– 100 грама мелени бадеми
– 300 грама мелени бисквити
– 100 грама путер, растопен
Подготовка:
Подлога: Во длабок сад се ставаат 300 грама мелени бисквити, 100 грама мелени бадеми и 100 грама путер растопен. Се заедно се меша да се сврзат состојките, ако е многу суво се додаваат 2-3 лажици млеко, од оваа песоклива смеса се вадат 5 полни лажици и се оставаат настрана, ќе ги користиме за горниот слој. Оваа смеса се сипува во 20 см модла за торти, со лажица се притиска смесата да се распореди насекаде. Се става во замрзнувач 20 минути да се стегне подлогата.
Фил:
• Белото чоколадо се топи на пареа и се остава да се излади.
• Јагодите се чистат, се мијат и се оставаат во цедалка да се исцеди водата. Се пасираат 200 грама јагоди во блендер. Се ставаат во тенџере на оган, им се додава 100 грама шеќер и откако ќе зовријат, се варат на средна температура 10 минути, а потоа преливот од јагоди се остава да се излади.
• За тоа време се мати маскарпонето со 150 грама шеќер во еден сад, а во друг сад се мати слатката павлака. На изматеното маскарпоне му се додава изладеното чоколадо со матење на миксер на средна брзина, на крај се додава изматената слатка павлака и се мати да стане хомогена бела смеса.
Филување: На изладената песоклива смеса во калапот, се става половина од белата смеса, се распоредува насекаде и се мазни, врз неа се редат 300 грама исечкани јагоди, врз нив се става целиот прелив од јагоди. Потоа се додава преостанатата бела смеса, се мазни одозгора и се посипува со песокливата смеса. Тортата се става во фрижидер да отстои еден час, да се стегне. Се вади обрачот од тортата, со преостанатите јагоди се декорира тортата одозгора и се сервира
Пријатно сладење!
Гастрономско уживање од вештите раце на Бобе Јанкоска: Проја со праз и сирење
Гастрономско уживање од вештите раце на Бобе Јанкоска: Тиквички полнети со моцарела
