Јованка Јанкоска Бобе, која стои зад блогот bobesbakery.mk, фејсбук и инстаграм-профилот, е вистински кулинарски креативец – нејзините рецепти се милина и за очите и за непцето.

Бобе денеска споделува рецепт за вистински гурмански деликатес – мусака со модри патлиџани.

– Мусака со модри патлиџани е вкусно и сочно јадење што освојува со својата слоевита структура и богат вкус. Мирисот на печени патлиџани, ароматичниот сос од мелено месо и нежниот бешамел создаваат совршена комбинација за секој ручек. За разлика од класичната мусака со компири, оваа варијанта е полесна, но еднакво вкусна и заситувачка – порачува Бобе.

Состојки:

За мусаката:

– 2-3 модри патлиџани (излупени и исечени)
– морска сол
– маслиново масло
– 50 г лебни трошки
– 230 г рендан кашкавал

За сосот од мелено месо:

– 1 лажица маслиново масло
– 2 главици кромид
– 400 г мелено месо
– 480 г домати
– 4 чешниња лук
– ¼ лажичка цимет
– ¼ лажичка пимент или лут сос
– сол и бел бибер
– 2 лажици доматно пире

За бешамел сос:

– 50 г путер
– 50 г брашно
– 250-350 мл млеко
– сол и бел бибер
– ½ лажичка морско оревче
– 3 жолчки

Подготовка:

Посолете ги модрите патлиџани и оставете ги 45 минути за да ја изгубат горчината.
Измијте ги, намачкајте со маслиново масло и испечете ги од двете страни во грил тава.
Во тава пропржете кромид, додајте месо и запржете. Додајте домати, лук, зачини и доматно пире. Оставете да покрчка.

За бешамел:

Растопете го путерот, додајте го брашното, постепено додавајте млеко, мешајте до згуснување, па додајте ги жолчките.

Редење:

Слој патлиџани, слој месо, кашкавал, повторете ја постапката. Завршете со кашкавал и прелијте со бешамел сосот.

Печење:

На 180 степени околу 60 минути со алуминиумска фолија, а последните 5 минути без фолија.
Оставете да се излади 15-20 минути пред сечење

На здравје!