Добро познатата изрека „пет порции овошје и зеленчук на ден“ веќе со децении е златен стандард за здравата исхрана.

Но, најновите научни истражувања сугерираат дека, наместо самата количина, треба да почнеме да размислуваме за видот на овошјето. Научниците предупредуваат дека сите овошја не се еднакви кога е во прашање заштитата на нашиот најважен мускул – срцето.

Најновата студија, објавена во престижниот магазин „Храна и функција“, која ја следела исхраната на повеќе од 30.000 учесници во Велика Британија и САД, открила загрижувачки тренд: дури и оние луѓе кои редовно ги консумираат препорачаните дневни дози на овошје и зеленчук честопати страдаат од недостиг на клучната хранлива материја – флаваноли, пишува Би-би-си.

Моќен антиоксидант кој спасува животи

Флаванолите се моќни растителни соединенија и антиоксиданти за кои е докажано дека ги намалуваат воспалителните процеси во телото и значително ја подобруваат функцијата на крвните садови. Претходните истражувања покажале дека оптималниот дневен внес на овие соединенија може да го намали ризикот од смрт од кардиоваскуларни болести за речиси една третина. За жал, статистиката покажува дека помалку од една петтина од општата популација консумира доволни количини од нив.

Професорот Гинтер Кунле од Универзитетот во Рединг истакнува дека пораката за пет порции дневно е точна, но дека можеби треба повнимателно да размислиме кои пет вида, всушност, ги избираме. Бидејќи овошјето и зеленчукот нудат многу различни нутритивни придобивки, со зголеменото разбирање на овие соединенија се отвора вистинска можност прехранбените упатства да станат значително поспецифични и поефикасни во пракса.

Авторите на студијата нагласуваат дека не мора драстично да ја менувате вашата исхрана, туку само попаметно да го избирате овошјето и зеленчукот следниот пат кога ќе одите на пазар. Главниот автор на студијата, д-р Хавиер Отавијани, објаснува дека вклучувањето само една шолја зелен чај со оброк или неколку бобинки може да направи огромна разлика во апсорпцијата на ова соединение.

Научниците затоа ги измериле точните вредности и составиле список на намирници што го предводат по количината на овој чувар на срцето по стандардна порција.

На самиот врв се наоѓаат сливите, бидејќи во една корпа од половина килограм тие носат дури 450 милиграми флаваноли. По нив следуваат брусницата со 300 милиграми на четвртина килограм и капините, кои во порција од 200 грама содржат околу 250 милиграми од оваа хранлива материја. За оние што претпочитаат напивки, шолја зелен чај е одличен избор бидејќи содржи 200 милиграми флаваноли.

Меѓу високорангираните намирници се гравот, кој во мал грст содржи 140 милиграми, потоа црешите со 130 милиграми на 400 грама плод. Многу високо на листата е и јаболко со средна големина, под услов да се јаде со лушпа, бидејќи содржи 110 милиграми. Листата на моќни чувари на здравјето ја заокружуваат јагодите со 90 милиграми, боровинките со 80 милиграми по корпа и пинто гравот, кој во количина од две лажици сув грав содржи околу 70 милиграми флаваноли.

Моќта на бобинките

Дека моќта на бобинките не е само теоретска, потврдило и паралелното клиничко испитување на експерти од Кралскиот колеџот во Лондон и Универзитетот во Рединг. Тие спровеле строго контролирана студија на здрави мажи и жени на возраст од 65 до 80 години.

Во период од 12 недели, дел од испитаниците консумирале пијалак направен од лиофилизиран прав од диви боровинки секој ден, а резултатите биле фасцинантни, бидејќи групата што консумирала боровинки имала значително понизок крвен притисок и подобрена циркулација, што директно го намалува ризикот од срцеви удари. Но, придобивката не застанала само на кардиоваскуларниот систем, бидејќи овие испитаници покажале и подобра меморија и 8,5 отсто поголема точност и концентрација во задачите за внимание.

Затоа, следниот пат кога ќе изберете меѓуоброк, односно ужина, имајте на ум дека еден грст темни бобинки, сочни цреши или шолја квалитетен зелен чај прават разлика помеѓу обична ситост и активна заштита на здравјето.

Тивок убиец на чинијата: Шест намирници што тајно го зголемуваат крвниот притисок

Три работи што треба да ги направите пред 9 часот наутро за срцето да ви чука како часовник